ვაჟა ხორნაულის შემოქმედება, მთლიანი, დაუნაწევრებელი თხრობაა წუთისოფლისა. რამდენიმე ათეული წელია მის შემოქმედებას კითხულობს და აგემოვნებს პოეზიით განებივრებული ქართველი მკითხველი.

ოცზე მეტი კრებულის ავტორი, დღევანდელი ტექნოლოგიების დახმარებით, წიგნის მიღმა, ონლაინრეჟიმშიც აწვდის მკითხველს თავის ლექსებს. მკითხველი უხვად ჰყავს ამ ავტორს. ან კი ვინ დარჩება გულგრილი მისი ნამდვილი პოეტური სიტყვისადმი.

მის შემოქმედებაში ბევრია კონვენციური 8 თუ 10 მარცვლიანი ლექსები, არის ვერლიბრიც და არის საოცარი გვირგვინი მისი შემოქმედებისა – მინიმალისტური ფორმის პოეზია, მაგრამ ყველგან ის ერთნაირად შეკრული, მყარი, გაუბზარავი ფასეულობის მქადაგებელია. დახვეწილი ფრაზის ოსტატი. სიტყვის გურმანი და რატომღაც, უარმყოფელი ყველანაირი სასვენი ნიშნისა.