გადაუჭარბებლად შეიძლება ითქვას, რომ ლადო ასათიანის ჩანაწერები მისი პოეტური სამყაროს კონტურული რუკაა, რომელშიც იკვეთება მთავარი ასათიანური მოტივები: სამშობლო, ქართული სიტყვა, სიცოცხლის კონცეფცია, მორალი, ზნეობა და სხვა ადამიანური ფასეულობები.
 

„ვიცი, ჩემი ცხოვრება ხანმოკლე იქნება და თვეებს საუკუნეებად ვითვლი“. ერთ დღეს ეს ფრაზა ჩაუწერია. ჩანაწერებს თარიღები არ უზის და არც არის საჭირო, ისედაც კარგად იკითხება აღსასრულისაკენ მიმავალი კაცის ფიქრები...