გამორჩეული პოეტის – ტარიელ ჭანტურიას ჩანაწერები, ორიგინალური სახელ-წოდებით – დინოზავრიდან დიზაინამდე, ისევე ახლობელი და მნიშვნელოვანია მკითხველისთვის, როგორც მისი პოეზია. თითქმის მთელ შემოქმედებით ცხოვრებას გასდევს ეს დაკვირვებანი, შთაბეჭდილებები წარსულისა და თანამედროვეობის აქტუალურ საკითხებზე – მკაცრი, ზოგჯერ სადაო და საკამათო, მაგრამ ყოველთვის ცოცხალი.

„მკითხველის წიგნი“ – ასე უწოდებს ავტორი წინასიტყვაობაში პირად ჩანაწერებს, და საკუთარ თავს კარგ მკითხველად, მუსიკის ერთგულ მსმენელად, თეატრისა და კინოს ერთგულ მაყურებლად, გამოფენების მოუღლელ მადევრად, მეცნიერებისათვის თვალმიდევნებულ დილეტანტად, საკუთარი ქვეყნისა და კაცობრიობის ბედზე მოფიქრალ მოქალაქედ წარმოგვიდგენს.