ანა კალანდაძის პროზა იმის უფლებას გვაძლევს, მას „პოეტი პროზაიკოსი“ ვუწოდოთ.

ანა კალანდაძის პროზაული ჩანაწერების ორტომეული 1996 წელს გამომცემლობა „საქართველომ“ მცირე ტირაჟით გამოსცა, ამიტომ ანა კალანდაძის პროზას ნაკლებად იცნობს მკითხველი. თითქმის 600 გვერდიანი წიგნიდან წინამდებარე გამოცემისთვის საჭაშნიკოდ ეს გამოვარჩიეთ – ნაწილი მინიატურებისა და ფრაგმენტები მოგონებებიდან, საუბრებიდან, ჩანაწერებიდან... ორიგინალურია ანასეული ის მონაკვეთი წიგნისა, რომელსაც „ფრაზებით დახატული პორტრეტები“ ვუწოდეთ. და ეს „ფრაზები“ არა მხოლოდ ამ დიდ პიროვნებათა პორტრეტებს გვიხატავს, არამედ თვით ანა კალანდაძისაც...