საკითხავი ტექსტები გაგება-გააზრებისა და ლექსიკური მარაგის გამდიდრებისთვის I-დან IV კლასამდე

 

მოძრაობა, ხაზი, ფერი, სინათლე. შემდეგ ასო-ბგერა, მარცვალი, სიტყვა. სიტყვიდან-საგნამდე, საგნიდან-სიტყვამდე საფუძველი ეყრება ცოდნას, რომელშიც დროთა განმავლობაში გაერთიანდება ენა, აზროვნება, წერა.

 

იწყება მოგზაურობა სასიტყვეთში. მოსწავლეები ეძებენ მსგავსი მნიშვნელობის სიტყვებს – სინონიმებს, საპირისპირო მნიშვნელობის სიტყვებს – ანტონიმებს, შეერთებულ სიტყვებს – კომპოზიტებს. მოპოვებული მასალით ადგენენ წინადადებებს, ამბებს, თავისუფალ მოთხრობებს და გადმოსცემენ იმას, რასაც ფიქრობენ. თანმიმდევრულად, თამაშ-თამაშით ასრულებენ შემოსახაზ, შესავსებ, შესადგენ დავალებებს, ხსნიან რებუსებს, კროსვორდებს, გამოცანებს. იწყებენ საკითხავი ტექსტების გაგება-გააზრებას. თვითონვე ხსნიან, რა არის ტექსტის მთავარი სათქმელი.

 

სწორად შერჩეული დავალებებით მოსწავლეები იმდიდრებენ ლექსიკურ მარაგს, უვითარდებათ წაკითხულის გაგება-გააზრების, პრობლემის იდენტიფიცირებისა და მასზე მსჯელობის, საკუთარი აზრის ჩამოყალიბების წერილობით გადმოცემის უნარები.